是鬼但但，同Simone走入一間便利店，手鎗一指住個收銀員個頭，咁佢就即刻攞晒啲錢出嚟，我仲攞多一打啤酒添。Simone就想要粒珍寶珠，通常擺喺收銀機旁邊，今次點解會無？問收銀員有無珍寶珠，佢話啱啱賣晒，我心諗“咁橋？”Simone當然好唔開心，我有啤酒，佢連一粒糖都無，收銀員見到咁情況，竟然問我：「你唔會開鎗殺我吖嘛？」我真係火到嚟埋，佢當我係咩人？我會因為一粒糖殺人咩？我係咁小器咩？佢咁樣睇人都有嘅？
我手指一緊，呯一聲，佢就應聲爆頭倒地，Simone都未知發生咗咩事，就搞到一頭一面都係腦漿，我望住佢個樣，忍唔住爆笑咗出嚟，真係好樣衰。
之後我同Simone去咗一間髮型屋洗頭，一入去就嚇親人，我話啱啱劏完豬。個髮型師游說Simone漂髮再挑染，Simone問我好唔好，反正無咩做，又有電視睇，咪由佢整到夠。
一路整，個髮型師就一路同Simone傾偈，又讚佢髮質好，頭髮又多，樣又甜美，膚色又健康，仲成日摸住Simone頭髮，色迷迷咁，讚到Simone眉飛色舞，仲話要倒杯汽水畀佢。我睇到眼火爆，一鎗打爆髮型師個頭，全場啲人V嘩鬼叫，我向天再開一鎗，全場靜晒，Simone個頭又滿晒腦漿血水，今次我幫佢洗頭，所有人都好乖，靜靜咁坐喺度睇我表演吹頭，臨走時Simone仲攞咗三支Mousse，真係貪心。
成日都好似無樣嘢順利，仲搞到我要隊冧兩個人，要搵返啲娛樂平衡吓至得。睇電影！咁啱《平凡西人》仲未落畫，呢套戲我睇咗 49 次，唔爭在睇多一次Simone就慘啲，又要陪我睇多次。我買咗包爆谷氹吓Simone，加多杯甜到溜嘅檸檬茶，咁又搞掂，佢即刻冧晒。
的而且確係一套好戲，勁爆！睇第 50 次仍然覺得好好睇，夠晒刺激！拍呢套戲嘅導演Steven真係勁，有朝一日可以見到佢就真係無得頂，死都抵！
文：Jackal
