一間向海嘅木屋，日日對住個海，望住日落，嗰種夕陽西下，紅霞滿天，海風輕吹嘅浪漫，歎得多都咪話唔悶……好彩我有個良好嗜好，就係睇電視！有時由朝睇到晚，睇足球，睇新聞，睇清談節目，睇法庭報道，睇卡通片，睇婦女節目，睇校際常識問答比賽，睇旅遊特輯，睇國家地理頻道，都咪話唔忙。
日子有功，我按遙控隻手指公都起咗個枕。Simone成日都話要睇Fashion TV，睇住啲模特兒行嚟行去，都唔知有咩咁吸引，我睇兩睇有啲頭暈添呀！
佢又鐘意睇個購物台，呢個台先離譜，影住個濾水器，唔駛入電嘅手搖電筒，都可以講足半個鐘。個主持雞啄唔斷咁搏命講，有幾多嘢好講啫，兩句就講完啦，成個節目又悶又煩，我同Simone最唔夾嘅睇怕就係呢樣嘢，所以久而久之，養成我遙控不離手嘅習慣，只要一離手，我又要捱呢兩個台，咁就真係人都癲。
點知呢個習慣背後嘅動機俾Simone識穿咗，佢竟然同我鬥早起身睇電視，目的就係攞到遙控嘅控制權，你精我都精，最後我直情袋住個遙控瞓覺，問你點樣早過我起身都無用，但係個後遺症就係「銀」到我大脾瘀晒。
過多幾日，我嘅警戒性略為下降，Simone竟然半夜偷咗我個遙控，仲將佢鎖起。我頂吖，佢以為鎖住個遙控我就轉唔到台，電視本身都有掣o架傻婆，最多辛苦啲走嚟走去啫，我係個醒目仔，我自製咗個遙控，就係地拖棍，坐喺梳化攞住支遙控棍，飲住啤酒，心情真係異常咁靚，我呢一仗真係贏得漂亮，Simone完全無我符，悶悶不樂咁坐埋一邊。人非草木，何況佢係我深愛嘅BB！見到佢咁，我一定會做啲嘢嘅。
經此一役，我哋更加了解，更愛對方。回想一下，我個心一軟，做人唔應該自己贏晒，我間唔中都會陪佢睇購物台，利用呢段時間瞓吓覺，爽到爆！
文：Jackal
