攞唔到珍寶珠食，我悶悶不樂。
一路上我都唔出聲，Jackal都無，因為佢好專心揸住架林寶堅利，架車去到荷里活名人豪宅區時，佢雙眼就好似發光一樣，唔係因為啲屋夠靚，而係因為佢好似搵緊啲嘢，當佢咁專心時，我當然又唔敢出聲。
Jackal呢排都好古怪，一套《平凡西人》睇足50次，佢唔悶我都想嘔。又成日睇電視新聞，睇報紙時又會將一篇篇文剪低，仲用我啲螢光筆間低晒，搞到我啲螢光筆無晒色，遲啲要去文具店攞番啲先得。
突然之間，佢將架車剎停，講咗一句：應該係呢度！
跟住佢咩都無講，攞晒啲鎗放晒入袋，我梗係跟到實，咁大個女，都未入過啲咁靚嘅屋。
去到門口，有個護衛「恰」緊眼瞓，Jackal喺佢後面，粒聲唔出，就搞掂咗佢，個護衛都幾幸福，都唔知咩事，無咩痛苦就去咗上帝度。
我真係唔知Jackal嚟做咩，不過，好似幾好玩。我地穿過一個好似足球場咁大嘅花園，先至行到去間屋，望吓望吓，發現居然無閂窗，究竟佢地係唔聽電視忠告，出街鎖好門窗，定係有一班人喺入面開Party呢？我好緊張呀，唔知喺呢度見到邊個明星呢？
文：Simone
（全文完，欲知後事，請到劇場尋找答案）
