Jackal其中一樣最吸引我，就係滿身嘅紋身，我成日覺得男人有紋身真係型好多，想像一下佢哋喺紋身過程，俾支針「逐下逐下」拮落去，不發一言，靜靜咁享受呢種痛楚，諗起都勁，諗起都型。
有次我趁Jackal瞓咗覺，靜靜咁欣賞佢既紋身，發現佢腰背有杯啤酒，裡面有條魚游來游去，好鬼得意。但係我越睇越唔妥，得一條魚游，咪好寂寞囉？所以我攞起一支墨水筆，喺條魚側邊畫多一條上去，仲用我支好靚的螢光筆，油埋顏色。
我喺度欣賞緊自己嘅傑作，Jackal一個反身就醒咗，佢問我做咩咪咪咀對著佢笑，我梗係叫佢欣賞自己杯啤酒入面多咗條魚。
我等緊佢讚我畫畫有天份，點知佢突然一手叉住我喉嚨，大聲喝問我點解搞佢個紋身，再一腳撐咗我落床，好彩我識打個筋斗，無損無傷。我從來未見過佢咁憤怒，佢同我講，呢個紋身，神聖不可侵犯，跟著佢仲喊起上來。
我最唔開心，就係見到佢唔開心。
我知我又做錯嘢，即刻攬住佢係咁鍚，大聲話：我以後唔敢喇！
我心諗，佢可能唔鍾意條魚的顏色。
文：Simone
