俾咗個電話號碼Jackal之後，我就好後悔，因為搞到我分分秒秒都望住個電話，個衰人，我以為佢實好似電影橋段咁，第二日即刻打電話俾我，點知我等嚟等去都係得個吉，我諗佢都係好似其他男人咁，永無下文。
我等咗幾日，終於等到佢電話，佢約我出去飲酒，問我好唔好，嘩！我平時仲飲唔夠咩，加上要我等咁耐，我一於要吊高嚟賣，我話：好你個頭！點知我講完個好字，佢就收咗線。
我攞住個電話仲喺度發呆之際，突然聽到強勁的汽車引擎聲，Jackal由一架好型的林保堅利跳落嚟，我簡直個心都唔知去咗邊，從來未試過有男人，駛架咁勁的車接我去街，我仲唔攬到佢實一實，瘋狂咁鍚佢。
細個睇住阿媽俾老豆打，返到學校俾大口仔蝦，咁多年嚟啲男人從來都係有性無愛，所以我真係發誓，自己孤獨過一世就算。
但係Jackal無端端出現就真係唔同晒，佢成日帶我穿州過省，我話想食咩就食咩，佢仲做埋我型象顧問，幫我配搭衣服，戒指手鈪，仲帶我一齊去揀紋身圖案，邊個男人色迷迷咁望住我，佢就即刻一槍打爆男人個頭。突然之間，我覺得我自己重要咗好多，再唔係一個淨係俾人揩油的啤酒妹！
文：Simone
