天氣非常悶熱，我喺屋企一邊飲啤酒，兩邊食住爆谷，三邊睇住電視，四邊將個遙控按嚟按去，五邊左行右企，六邊起身坐低。我雖然無生痔瘡，但仍然坐立不安；電視畫面雖然清晰，我個腦就屎坑咁亂；啤酒雖然冰凍，我個心依然火熱，唔係因為三十幾度嘅高溫，而係因為個啤酒妹Simone！
打定唔打？打定唔打？我講緊嘅係打電話，唔係打其他嘢，我實在好想打電話畀Simone，約佢出嚟睇戲食飯，兼且銷魂一晚………我問我自己，頭先食咗啲咩，會搞到自己咁樣？係呀，我食咗爆谷，原來爆谷會食懵人，而且仲懵到上心口！我心口真係黐住幾粒爆谷………我成副身家得幾草嘢，約佢出學轉膊（註一）咩？去邊呀？食塵，睇風景就得！
正所謂色字頭上一把刀，我就光棍身邊有支鎗。
大笨象，揸支鎗，去打仗。我馬咁長，揸支鎗，緊係去打劫。乜嘢都有第一次，打劫都唔會有例外。萬丈高樓從地起，我決定由低做起－－打劫地牢酒吧！
我用我僅有嘅幾草嘢，搭灰狗（註二）去第二個州，咁樣就無人認得我。搭咗四個幾鐘頭長途車，坐到腰都直，去到一個唔知係乜鬼嘢鎮，居然有條酒吧街，我四圍咁望，夜晚十一點幾仲通街都係人。
好！人多夠刺激。行下行下，抬頭一望，有個霓虹招牌閃呀閃呀，鬼死咁搶眼，寫住「金庫酒吧」，咁就呢間啦！
一入到去，嘩！駛唔駛咁多人？音樂又勁大勁嘈，燈光又暗，我都闊佬懶理（用窮鬼懶理可能會貼切啲），大步大步行去收銀處，一支鎗就指住個收銀姐姐，我都未話打劫，佢就打開收銀機，攞咗叠錢畀我，我呆咗一呆，係咪咁易呀？我一粒聲都無出過，咁就搞掂？唔理咁多，收錢走人，臨走我仲錫咁個收銀姐姐一啖，表示謝意！根本無人留意我，無人知道發生咩事，我身邊逼滿晒人，就係無人知。
打劫，仲易過問人借火！
行出酒吧，我心情異常咁興奮，我即刻打電話約Simone出嚟，佢竟然一口應承，我心急如焚，仲搭灰狗！一街都係車泊晒係度，偷架車飛返去啦。我眼前一亮，林寶堅尼，會唔會過份咗啲？
實在太過份，竟然可以咁快，林寶堅尼，十個勁呀！一個鐘頭就返到去接Simone，佢見到架車即時尖叫，唔駛講，緊係熱吻一番啦。同佢去咗一間酒吧飲嘢，唔係橋到咁啫下話，又係「金庫酒吧」？集團經營，好，反正啲錢都係你，幫襯你又點話。
入去坐低，侍應問Simone夠唔夠18歲，態度異常之差，我話夠，個侍應仲要Simone攞身份證出嚟睇，我話我攞畀你，跟住一鎗打爆佢個頭。
我嘅興奮感覺又嚟啦，我拖住Simone，大遙大擺咁行出去，揸住架林寶堅尼飛馳去郊外，停埋一邊，就咁喺架迫夾嘅車廂入面，同Simone瘋狂咁做愛，直到天光！
Jackal
18.5.2005
註一︰「轉膊」……即是「托」的意思，由此推展，可以將杜斯托也夫斯基，說
成杜斯轉膊也夫斯基，烏托邦可以說成烏轉膊邦。
註二︰「灰狗」……是美國一家巴士公司，即如香港的九巴，城巴，新巴。
