可能我一向都唔鍾意講嘢，只係鍾意一個人靜靜咁坐埋一邊，所以我從來都唔得人歡心。
當年我只有六歲，坐喺隔離位個男仔，隻眼細到得一條線，個口就成隻橙咁大，講嘢嗰陣仲鬼咁大聲，驚死人唔知佢喺度咁。呢隻大口仔，吼準我唔鍾意講嘢，偏偏成日喺我耳仔側邊大聲講大聲笑，我已經唔睬佢，但係佢成日問我係咪啞，定係由火星嚟，聽唔明佢講乜嘢，我一於少理，繼續睇同學借俾我本公仔書，書入面啲女仔個個都好靚，眼大大，條條裙都靚都死。
大口仔突然之間，搶走我本公仔書，我梗係唔放過佢，我唔食一個禮拜早餐，都唔夠錢買返本書賠俾人，更何況我根本無錢食早餐！
我追住大口仔，一手捉著佢，佢居然突然之間擘大佢個死人口，一啖咬落我耳仔，仲扯著我頭髮，死都唔放，我痛到覺得個頭就嚟甩。可能我知自己唔靚，但係我覺得自己最靚就係把頭髮，我仲成日夢想，可以好似公仔書入面啲女仔咁，電攣佢。
所以佢呢下扯我頭髮真係惹起我把火，我隨手執起張櫈，「兜」頭扑落去。死大口仔，平時大大聲聲，蝦蝦霸霸，但係身手極差，閃開都唔識，額頭當堂見血，仲擘大個死人口，喊聲連遠在北極的聖誕老人都聽得到。（後來我先知道聖誕老人來自芬蘭，再後來仲知道根本無聖誕老人，頂！）
我抬頭一望，一個滿面鬍鬚的男人，企正喺我面前，二話不說「醒」我五條手指印，我塊面赤赤痛。呢個老師大叫：睇你唔出平時粒聲唔出，打人咁狼死，喝你都唔停手！係咪想打死人！
嘩！我咁火遮眼，鬼知老師出現左咩，佢居然仲話，睇住我無端端打人，完全唔聽我解釋，仲罰我洗廁所。有無搞錯，世界仲有無道理，關我咩事？有咩理由罰我唔係罰大口仔？
我望著本扯爛咗的公仔書，個頭仲痛到閃吓閃吓，望著笑得非常得戚的大口仔，同埋目露兇光的老師，我覺得所有男人都係衰人！
我發誓：我要報仇！
我發誓：唔會再俾人扯我頭髮！
文：Simone
