我好鍾意睇西部牛仔片，每次喺電視見到啲牛仔鎗戰，我都好興奮，我會即刻企起身，金睛火眼望實個瑩光幕，模仿佢哋嘅動作，我個心會跳得好快，特別係有人中鎗嗰陣，我就會有一種前所未有嘅快感，流遍全身，好耐好耐都唔能夠散去。
我更加鍾意睇決鬥場面，即係兩個人，一人企一邊，雙手垂下，兩腳掰開，四目交投，你一句我一句講唔停，個鏡頭一時影住隻手，一時影住個頭，一時影住隻眼，一時影住個咀，一時影住額角嘅汗，一時影住對靴（都唔知影對靴做乜），一時影下呢個，一時影下嗰個，全部都係大特寫，畫面愈轉愈快，跟住一個闊鏡，影晒兩個人，加上一啲西部牛仔音樂，兩個人呢一刻都粒聲唔出，郁都唔郁，一陣強風刮起沙塵，一個乾草球喺兩人之間轆過。突然間，就好似閃電咁快，兩個人同時拔鎗———砰！鎗聲只有一響，快到根本睇唔到邊個開鎗，兩個人仍然企喺度，你仲要估下究竟邊個中鎗，五秒之後，其中一人收起支鎗入鎗袋，跟住倒地身亡！
正！睇到呢度，我啲血差唔多滾熱辣到蒸發咁滯，我就會攞起我支玩具氣鎗，同隔離屋嘅朋友仔玩決鬥，有時又會射下牛棚啲牛，睇見啲牛中彈嘅反應，我就可以開心半日。
我成日問我阿爸，我幾時可以有支真鎗，一支屬於我嘅真鎗。阿爸為免我成日煩佢，就隨便開咗個盤口，佢話只要我成個學期都準時返學，無一次遲到紀錄，佢就會送支鎗畀我。佢一啲誠意都無，明知我日日都遲到，日日都唔願起身返學！
為咗支真鎗，為咗達成心願，我接受咗我阿爸嘅挑戰。
學期終於完結，最後一日嘅學終於返完，我衝返屋企，阿爸已經坐喺廳中，一份包裝精美嘅禮物就放喺茶几上面，阿爸只係講咗一句︰「做得好！」
呢一刻，我喺阿爸身上學到一樣好重要嘅做人宗旨，就係「承諾」！
而我經過呢次亦訓練到自己有一種終身受用嘅精神，就係「意志」！
就喺小學六年級完結嘅一日，我擁有我人生第一支鎗。
文：Jackal
30.06.1985
22:30
